ကုသိုလ်လုပ်လို့ ကုသိုလ်ရတာ ဟုတ်ရဲ့လား
ဒကာ။ ။ အချို့လူတွေက ကုသိုလ်လုပ်ရင် ကုသိုလ်ရတာပေါ့၊ ကုသိုလ်လုပ်ရင် ကုသိုလ်ရမှာပေါ့ဟု ပြောနေကြတာ မှန်ပါသလား ဘုရား။
ကုသိုလ်လုပ်ရင် ကုသိုလ်ရဲ့ အကျိုးဖလ လုပ်ခ၀ိပါက်ကိုသာရမှာ မဟုတ်ပါလား ဆရာတော်၊ ဒါ့ကြောင့် ရှင်းပြပါဦး ဆရာတော်။
ဆရာ။ ။ အင်း.. ကုသိုလ်လုပ်ရင် ကုသိုလ်ရတယ်ဆိုတာလည်း မှန်တယ်၊ ကုသိုလ်လုပ်ရင် ကုသိုလ်ရဲ့ အကျိုးဖလ လုပ်ခ၀ိပါက်ရတယ်ဆိုတာလည်း မှန်တာပဲ၊ ရှာရှာဖွေဖွေ တော်တော်မေးတဲ့ သူတွေပဲကိုး။
ဒကာ။ ။ ကုသိုလ်လုပ်လို့ ရတဲ့ကုသိုလ်ကို ရှင်းပြပါဦးဆရာတော်၊ ပါဠိတော်မထောက် သာဓကများနဲ့ မှတ်သားရအောင်ပါဘုရား၊ ပြဿနာကပေးလို့ မေးရတာပါ။
ဆရာ။ ။ အင်း.. ၀ိပဿနာကုသိုလ် ပြုလုပ်ပွားများရင် မဂ်ကုသိုလ်ကို ရနိုင်တယ်၊ ပါဠိအထောက်အထားကတော့ ပဋ္ဌာန်းကျမ်းကြီးထဲမှာ များစွာပဲ ပါရှိပါတယ်။
ကုသလော ဓမ္မော ကုသလဿ ဓမ္မဿ ဟေတုပစ္စယေန ပစ္စယော...လို့ ပဋ္ဌာန်းပါဠိတော် ပဥှာဝါရမှာ ဟောတော်မူတယ်၊ အဲဒါဟာ ကုသိုလ်လုပ်လို့ ကုသိုလ်ရတယ်လို့မှတ်၊ ၀ိပဿနာ ပွားများအားထုတ်တာက ကာမာဝစရ ဉာဏသမ္ပယုတ် လောကီကုသိုလ်၊ ယင်းကြောင့် ရတာက လောကုတ္တရာ မဂ်ကုသိုလ်တွေဖြစ်တယ်၊ အဲဒါဟာ ကုသိုလ်လုပ်လို့ ကုသိုလ်ရတာပေါ့၊ တိုတိုပဲ ထပ်မမေးနဲ့။
ကုသိုလ်လုပ်လို့ လူ့ချမ်းသာ နတ်ချမ်းသာ ဗြဟ္မာ့ချမ်းသာ ၀ိညာဉ် နာမ်ရုပ်စတဲ့ ၀ိပါက်အကျိုးဖလတွေ ရတာကိုတော့ ပြောစရာ မလိုတော့ပါဘူး၊ လူတိုင်း သိပြီးသားပဲဟာ။
ဒကာ။ ။ မှန်ပါ့၊ ရှင်းပါပြီ ဆရာတော်၊ ၀ိပဿနာကုသိုလ်က မဂ်ကုသိုလ်ကိုပေးတာကို ယုံကြည်ပါတယ် ဘုရား။
ဆရာ။ ။ အင်း... ဟုတ်တယ်၊ ၀ိပဿနာ ဉာဏ်စဉ်ဆယ်ပါးထဲမှာ ဆယ်ခုမြောက် အနုလောမဉာဏ်က နေပြီး ပေါင်းကူးကာ မဂ်ကုသိုလ်ကို ပို့ပေးလိုက်တာပဲ၊ သိချင်ရင် ၀ိပဿနာတရားပွားများအားထုတ်ပါ၊ ဒါဟာ ဒကာကြီးတို့ အလုပ်ပဲ၊ ဂေါတြဘူတွေ၊ ဝေါဒါန်တွေ ပွေမလာနဲ့ တော်ပြီ။
ဒကာ။ ။ ကောင်းပါပြီ ဆရာတော်၊ အလုပ်ကိစ္စတွေပြီးရင် အားထုတ်ပါမည့် ဘုရား။
ဆရာ။ ။ အင်း... ကိစ္စပြီးအောင် စောင့်နေ၊ အလုပ်ကိစ္စက သေတာတောင် ပြီးမှာ မဟုတ်ဘူး။
စုတိကိစ္စနဲ့ သေပြီးတော့ကာ ပဋိသန္ဓေကိစ္စ တစ်ခါဖြစ်၊ အလုပ်ကိစ္စတွေက ဆက်နေတာနော်၊ ကိုင်း.... သွားတော့၊ နောက်ကို ကိစ္စပြီးမှဆိုတဲ့ အသုံးမျိုးမသုံးပါနဲ့၊ ကုသိုလ်လုပ်လို့ ကုသိုလ်ရချင်ရင် ၀ိပဿနာတရားကို အားထုတ်ပါ ဒါပဲ။
ဒကာ။ ။ မှန်ပါ့၊ အမိန့်တော်အတိုင်း အလုပ်ကိစ္စ ကြားထဲကပဲ ၀ိပဿနာတရားကို ပွားများအားထုတ် ပါမည် ဘုရား။
No comments:
Post a Comment