လူနာများ လိုက်နာပြုကျင့်ရမည့် အင်္ဂါရှိပါသလား
ဒကာ။ ။ ဆရာတော် မကျန်းမမာဘူးကြားလို့ လာတာပါ၊ ဘယ်လိုဖြစ်တာလဲ သက်သာပါရဲ့လား။ ဗုဒ္ဓဘုရားကကော လူနာများအတွက် ကျန်းမာရေးနည်းလမ်းများ လိုက်နာပြုမူရန် ညွှန်ကြားပေးတာ ပိဋကတ်တော်မှာ ရှိပါသလားဆရာတော်။
(၁၃၃၅ ခု တော်သလင်းလက ဖြစ်သည်၊ သေလုနီးပါး ခံစားရသည်။)
ဆရာ။ ။ အင်း…. သက်သာပါပြီ နှလုံးရောဂါပါပဲ၊ ပါရဂူကြီးဦးမွန်ဟန်တို့ ဦးရွှေတင်တို့ ကိုယ်တိုင် ကျောင်းကိုလာကာ စက်တွေနဲ့ ကြပ်မတ် ကုသပေးကြပါတယ်၊
အင်္ဂုတ္တရ ပဉ္စက ဂိလန၀ဂ်မှာ လူနာရဟန်းများလိုက်နာရန် ညွှန်ကြားချက်တွေရှိပါတယ်၊ ဂိလာန ပုဂ္ဂိုလ်ဟာ….
၁။ မိမိရောဂါနှင့် သင့်လျော်သော ဆေး အစာတို့ကိုသာ မှီဝဲသုံးဆောင်ရမည်တဲ့။
၂။ သင့်လျော်လျောက်ပတ်သည်ကို ပမာဏအတိုင်းအရှည်သိ၍ မှီဝဲသုံးဆောင်ရမည် တဲ့။
၃။ မသင့်လျော်သော နေရာ အရပ် အိပ်ရာ နေရာတို့၌ မနေထိုင်ရတဲ့။
၎။ ဆရာညွှန်ကြားသော စကားကို လိုက်နာ ကျင့်ကြံ ပြုမူရမည်တဲ့။
၅။ မိမိရောဂါကို သည်းခံကာ သတိအမှတ်ဖြင့် နေရမည်၊ သတိလွတ်ကာ အော်ဟစ်ဆူ ပူ ညည်းညူခြင်း မပြုရတဲ့။
အဲဒီငါးပါးဟာ လူနာများအတွက် မြတ်ဗုဒ္ဓရဲ့ ညွှန်ကြားချက်ပါပဲ၊ ဒကာကြီးတို့လည်း လိုက်နာဖို့ အလွန်ကောင်းတယ်နော်၊ ပိဋကတ်တော်မှာ လူမှုရေး၊ ယဉ်ကျေးမှုတွေ အပြည့်အစုံ ပါတယ်။
ဒကာ။ ။ မှန်ပါ့၊ တယ်ကောင်းပါလား ဆရာတော်၊ သည် ငါးပါးသိရတာ ကျေးဇူးများပါတယ် ဆရာတော်၊ တပည့်တော်တို့ လိုက်နာစရာတွေပါပဲ။
No comments:
Post a Comment