အ၀ိဇ္ဇာပစ္စယာ သင်္ခါရာ ကုသိုလ်လုပ်တာ မိုက်လုိ့တဲ့
ဒကာ ။ သင်္ခါရဟာ အ၀ိဇ္ဇာကြောင့် ဖြစ်တာ၊ လောကီကုသိုလ် သင်္ခါရဟာ အို၊ နာ၊ သေကိုသာ ပေးတတ်လို့ ကြောက်စရာကောင်းတာမို့ မိုက်လို့လုပ်ကြတာ မပြုကြနဲ့လို့ ဆရာအချို့က ဟောကြားနေတာ မှန်ပါသလား ဆရာတော်။
ဆရာ။ ။ အို... ဉာဏသမ္ပယုတ် ကုသိုလ်သင်္ခါရစစ်မှန်လျှင် ပြုသာပြုပါ ကြောက်စရာ မလိုပါဘူး၊ ၀ဋ်ဒုက္ခကို ရမှသာ ကြောက်ရတာ၊ သံသရာဝဋ် ဆင်းရဲကို အပြစ်မြင်ပြီး ကုသိုလ်လုပ်ဖို့ ပေးလှူဖို့သာ အရေးကြီးတာ ဖြစ်တယ်။
ဒုက္ခနယ်ထဲမှာ နစ်မျောနေရတဲ့ သင်္ခါရမကင်းသေးတဲ့ ဒုက္ခကောင်တွေက ကြီးကြီးကျယ်ကျယ် သင်္ခါရကုသိုလ်က သံသရာရှည်ကလေး ကြောက်စရာ ကောင်းသလေး မိုက်လို့ပြုတာလေးနဲ့၊ သာသနာဖျက်စကား အပါယ်လားမည့် အမှားတွေကို ပြောကြားနေကြတာ၊ သွားပြီး မယုံလိုက်နဲ့၊ မီးပုံထဲ အတူတူ ခုန်ဆင်းရတော့မှာ သေချာပေါက်ပဲ။
ဒကာ။ ။ တပည့်တော်တို့ နားလည်အောင် နည်းနည်းလောက် ရှင်းပြပါဦး ဆရာတော်။
ဆရာ။ ။ အင်း... သဘောပေါက်အောင်လည်း နားထောင်မှဖြစ်မှာ၊ အ၀ိဇ္ဇာသဘောက ဒုက္ခသစ္စာ ဘ၀ဒုက္ခဆင်းရဲ အမှန်ကို မသိဘဲ ဘ၀သမ္ပတ္တိ ဘောဂသမ္ပတ္တိ လူ၊ နတ်ဘ၀ဟာ ချမ်းသာတာ အမှန်ပဲဟု အမှားကို စွဲယူသိမှတ်ကာ အမှန်ဟု ထင်နေသိနေတာ၊ အဲဒီတော့ ဘ၀ချမ်းသာကို လိုချင်တဲ့တဏှာဝင်လာ တာပေါ့၊ အဲဒီတဏှာက လိုချင်တော့ မရရင်မနေနိုင်အောင် စွဲလမ်းတဲ့ ဥပါဒါန်က သင်္ခါရနဲ့ ကမ္မဘ၀တို့နဲ့ ပေါင်းပြီး ပြုလုပ်တဲ့ ကုသိုလ်သင်္ခါရမျိုးကိုသာ ကြောက်စရာလို့မှတ်ရမှာ၊ သူကသာ ဘ၀သံသရာကို ရှည်လျားအောင် လုပ်နေတာ၊ သင်္ချိုင်းကုန်းပို့နေတာ။
ကိလေသ၀ဋ်မပါတဲ့ သင်္ခါရ
ထပ်ပြောမယ် နားထောင်ပါ။
အ၀ိဇ္ဇာ အမှားကိုပယ်ကာ ၀ိဇ္ဇာဉာဏ်အမှန်ကိုမြင်လျက် ၀ဋ်ဆင်းရဲမှ ထွက်မြောက်ရာ နိဗ္ဗာန်ချမ်းသာကို သာ တောင့်တဆန္ဒပြုသော ဒါန၊ သီလ စတဲ့ကုသိုလ်သင်္ခါရသည် မဂ်ဖိုလ်နိဗ္ဗာန်ကို မြန်မြန်ရောက်အောင် ပို့ဆောင်ပေးတာ အမှန်လို့သာ ယုံကြည်စွာနဲ့ ပြုလုပ်ပါ။
အဲဒီကုသိုလ်သင်္ခါရမျိုးက အ၀ိဇ္ဇာမပါတဲ့ မဟာကုသိုလ် ဉာဏသမ္ပယုတ်မျိုးမို့ ၀ဋ်ဒုက္ခအကျိုးပေးစေကာ မူ ခဏမျှသာကြောက်စရာမို့ ကြောက်ကြောက်နဲ့ပင် ကြိုးစားပြီး ဆင်ခြင်ဉာဏ်နဲ့ ပြုလုပ်ပေတော့ သဘောပေါက် ရဲ့လား ဒကာကြီးတို့၊ ဘ၀ကို သာယာမှုတဏှာ မပါစေနဲ့ အဲဒါပဲ၊ ကဲ...တော်ပြီ။
ဒကာ။ ။ ကောင်းလိုက်တဲ့ အဖြေပါပဲဘုရား၊ သဘောပေါက်ရှင်းသွားပါပြီ ဆရာတော်၊ အ၀ိဇ္ဇာ တဏှာမပါတဲ့ ကုသိုလ်သင်္ခါရမျိုးပေါ့နော်။
No comments:
Post a Comment