နတ်ဖမ်းစားခြင်း၊ နတ်က မ စ ခြင်းများ ရှိပါသလော
ဒကာ။ ။ နတ်များက လူသားတို့အား ပစ္စည်း၊ ဥစ္စာ ပျက်စီးအောင် ဖျား၊ နာ၊ သေကျေအောင် ဖမ်းစားခြင်းနှင့် လူသားတို့အား ချမ်းသာအောင် ဘေးကင်းအောင် မစ ခြင်း ထောက်ပံ့ခြင်း ပြုနိုင်ပါသလား ဆရာတော်။
ဆရာ။ ။ အင်း… ဒီကိစ္စမျိုးက လူသားတို့၏ ကောင်း၊ ဆိုး၊ ကံအပေါ်မှာ တည်နေတာဖြစ်တယ်၊ ဧကန္တသဘောမျိုးနဲ့ ပြောလို့မရဘူး။
ဒကာ။ ။ ဒကာကြီးတို့ ရှင်းရှင်းသိအောင် နည်းနည်းလောက် လင်းပြပေးပါဦး ဆရာတော်၊ လူသားတို့ ကံအပေါ်မှာ ဘယ်လိုတည်နေတာလဲ ဘုရား။
ဆရာ။ ။ ကုသိုလ်ကံဟုန် အရှိန်အားကောင်း၍ ဘုန်းတန်ခိုးတိုးတက်ကာ ကျန်းမာလျက် စီးပွားဥစ္စာ တိုးတက်ချမ်းသာနေသော သူတစ်ယောက်အား နတ်များက ဖျားနာ၊ သေကျေအောင် စီးပွားဥစ္စာ ပျက်စီးသွားအောင် ၀င်ရောက်နှောင့်ယှက် ဖမ်းစားမှု မပြုနိုင်ဘူးတဲ့။
ထိုကုသိုလ်ကံရှင်အား ကျန်းမာသည်ထက် ပိုမိုကျန်းမာအောင် ချမ်းသာသည်ထက် တိုးတက်ချမ်းသာ အောင်သာ မ စ ကြည့်ရှုထောက်ပံ့မှုများ ပြုပေးနိုင်တယ်၊ ပျက်စီးနိမ့်ကျအောင် မကိုင်နိုင် မဖမ်းစားနိုင်ဘူး၊ သည်ကိစ္စအားလုံးဟာ ထိုသူရဲ့ ကုသိုလ်ကံအရှိန်အဟုန်အပေါ်မှာသာ တည်နေတယ်၊ ကိုယ့်ကံသာလျှင် လိုရင်းပဓါန ဖြစ်တယ်။
ဒါကြောင့် ပစ္စည်းဥစ္စာပေါများ တိုးပွားချမ်းသာချင်ရင် ရတနာသုံးပါးနဲ့ စပ်တဲ့ကုသိုလ်ကံတရားများကိုသာ ကြိုးစားပွားများ ရှာမှီးစုဆောင်းရမည်၊ ကုသိုလ်ကံ အကျိုးပေးခွင့် ရသူကိုမှ နတ်များက ကြည့်ရှုကူညီမှိုင်းမနိုင် သည်လို့ မှတ်ထားရမည် ဒကာကြီးတို့ရ။
အဲဒီလိုပဲ ကုသိုလ်ကံနည်း၍ အကုသိုလ်ကံထဲဝင်လာတဲ့ သူများကိုလည်း နတ်အပေါင်းတို့က ၀င်ရောက် နှောင့်ယှက် ဖမ်းစားနိုင်တယ်၊ ပစ္စည်းဥစ္စာတွေ ဆုံးရှုံး ပျက်စီးအောင် မီးလောင်အောင် ရေမြုပ်အောင် ပြုလုပ်နိုင် တယ်၊ ဖျားအောင် နာအောင် သေအောင်လည်း ပြုလုပ်နိုင်တယ်။
မကောင်းကျိုးခွင့်ရနေသော အကုသိုလ်ကံနဲ့ပေါင်းကာ အကုသိုလ်ကံမကုန်ခင်သာ နတ်များက ၀င်ရောက်နှောင့်ယှက် ဖျက်ဆီးနိုင်တာ၊ နတ်တို့သဘောက ကုသိုလ်ကံတန်ခိုး အကျိုးပေးနေတဲ့ ကာလမှာ တိုးတက်သည်ထက် တိုးတက်အောင် တွန်းတင်ပေးလေ့ရှိသလို ကုသိုလ်ကံကုန်ခန်းပြီး အကုသိုလ်ကံအလှည့် ရောက်လာတဲ့အခါမှာလည်း အဆင်းကို တွန်းချပေးလေ့ရှိကြတယ်။
ကုသိုလ်ကံကို ပုညလို့ခေါ်တယ်၊ ပုညကိုပင် ပုဉ်းကံလို့ခေါ်တယ်၊ (ပုဉ်းတန်ခိုးမှ ဘုန်းတန်ခိုး) ဖြစ်လာတာ၊ ဒါ့ကြောင့် ကိုယ့်ရဲ့ ကုသိုလ်ဘုန်းကံကြောင့် နတ်များက လာရောက် မ စ တာဖြစ်တယ်။
အဲဒါကြောင့် နတ်များ ကူညီညာဝိုင်း မှိုင်းမကြတာလည်း ကိုယ့်ရဲ့ကုသိုလ်ကံတန်ခိုးကြောင့်သာလို့ မှတ်ပြီး ကုသိုလ်ကိုပဲ ထပ်သလဲလဲ မပြတ်မစဲရအောင် ကြိုးစားရမည်၊ နတ်ကိုင်ခြင်း၊ နတ်ဖမ်းစားခြင်းကြောင့် ဆင်းရဲဒုက္ခရောက်ရင်လည်း ကိုယ်လုပ်ခဲ့တဲ့ အကုသိုလ်ကံကြောင့်သာ ကိုင်နိုင်၊ ဖမ်းစားနိုင်တာပဲလို့ ကုသိုလ်ကံကိုပဲ များများရအောင် ကြိုးစားအားထုတ်ရမည်၊ နတ်တို့ကို မေတ္တာပွားများရမည်၊ အမျှဝေပေးရမည်၊ မိမိဘုန်းကံကြီးမားသူဖြစ်အောင် ကုသိုလ်ပုညကိုသာ များများလုပ်ရမယ် ဒကာကြီးတို့ရ။
ဒကာ။ ။ မှန်ပါ့၊ အပြည့်အစုံသာ ဆက်လက်မိန့်ကြားတော်မူပါ ဆရာတော်၊ သည် ပြဿနာက အရေး ကြီးလို့ပါ ဘုရား။
ဆရာ။ ။ အင်း… ဒုက္ခဆင်းရဲ ရသည်ဖြစ်စေ၊ ချမ်းသာသုခ ရသည်ဖြစ်စေ၊ နတ်ကြောင့်သာဖြစ်ရသည် ဟု နတ်ကိုယုံ၍ ပုံအပ်ကာ ကိုးကွယ်ကြလျှင် သရဏဂုံ ပျက်သည်၊ မိစ္ဆာဒိဋ္ဌိဖြစ်သည်၊ သည်လိုနတ်မျိုးကို မဆိုထားနဲ့ (လောကမှာ အတုမရှိတဲ့) တန်ခိုးတော်ရှင် မြတ်စွာဘုရားသခင်သော်မှ ပါရမီကုသိုလ်ကံရှိသူကိုသာ ကယ်တင် ချွေချွတ်နိုင်သည်လို့ မှတ်ရမည်၊ ကဲ… ရှင်းရဲ့လား လင်းရဲ့လား၊ ဒကာကြီးတို့ ကိုးကွယ်ဆည်းကပ်ရမှာ က သရဏဂုံသုံးပါးသာ ရှိတာ၊ အဲဒါကို သတိကြပ်ကြပ်ထားပါ။
ဒကာ။ ။ ရှင်းလင်းပါပြီ ဆရာတော်၊ ကိုယ့်လုပ်ခ ကုသိုလ်ကံကိုသာ ကိုယ်ယုံကြည်အားထားရမည် ဆိုတာကို မမှိတ်မသုံ ယုံကြည်ပါပြီ ဘုရား၊ နတ်ဝိဇ္ဇာတို့က သရဏဂုံထဲပါတာမှ မဟုတ်တာ။
No comments:
Post a Comment