ဗုဒ္ဓမြတ်စွာသည် ဘ၀သံသရာရှိကြောင်းကို လက်ခံ အားပေးပါသလား
ဒကာ။ ။ ဗုဒ္ဓဘုရားသည် လူနတ်ဗြဟ္မာ စည်းစိမ်ချမ်းသာခေါ်တဲ့ ဘ၀သံသရာရှိကြောင်းကို လက်ခံအားပေးပါသလား ဆရာတော်။
ဆရာ။ ။ မြတ်ဗုဒ္ဓသည် မိမိကိုယ်တိုင် ဘ၀အမျိုးမျိုး၌ ဖြစ်ရှိလာခဲ့ဖူးရကြောင်းများနှင့် ထိုထို ဇာတကပါဠိတော်တို့၌ ဟောကြားတော် မူခဲ့သောကြောင့် ခန္ဓာ၊ အာယတန၊ ဓါတ်ခေါ်တဲ့ ဘ၀သံသရာရှိကြောင်းကို လက်ခံတော်မူသည်ဟု ပြောနိုင်တယ်။
သို့သော် ယင်းကို လက်ခံသော်လည်း ဘ၀သံသရာကို မသာယာ မခင်မင် မလိုချင် မတပ်မက် မဆာလောင် မစွဲလမ်းရန်ကိုကား အပြစ်အမျိုးမျိုးပြ၍ ပယ်ရှားရန် ဟောကြားတော်မူသည်၊ ဘ၀ရှာမှီးရေးကို အားပေးတော်မမူဘူး၊ ဘ၀ကို ဒုက္ခသစ္စာနှင့် ပြ၍ လွန်မင်းစွာ စက်ဆုပ်ရွံရှာတော်မူသည်။ အင်္ဂုတ္တရ ဧကဓမ္မသုတ်တော်၌..
ရဟန်းတို့ အနည်းငယ်မျှသောမစင်၊ ကျင်ကြီးသည် စက်ဆုပ်ဖွယ်ရာ မကောင်းသော အနံ့ကိုသာ နံစော် စေသလို ငါဘုရားသည် အနည်းငယ်မျှသော ဘ၀အဖြစ်ကိုမျှ အားပေး ချီးမွမ်းတော် မမူပေဟု ကဲ့ရဲ့ရှုတ်ချ အပြစ်ပြ၍ ဟောကြားတော်မူခဲ့တယ်။
ဇောတိက အနာထပိဏ် ဘ၀မျိုးကို ရယူနိုင်ရန် ဗုဒ္ဓ ဟောကြား
အားပေး လက်ခံတယ် မဟုတ်လား
ဒကာ။ ။ ဒီလိုဆိုရင် လောကမှာ ဇောတိက ဇဋိလ ကာကောဏ္ဏ ၀ိသာခါ အနာထပိဏ် စတဲ့ သူဋ္ဌေးကြီးတွေ လူမင်း၊ နတ်မင်း၊ ဗြဟ္မာမင်း ဘ၀စည်းစိမ် ချမ်းသာတွေကို ဗုဒ္ဓဘုရား ဘာ့ကြောင့် ချီးမွမ်းဟော ကြားတော်မူပါသလဲ ဆရာတော်။
ဆရာ။ ။ အင်း... အဲဒီဘ၀မျိုးတွေကို အားပေးရယူနိုင်ဖို့ ဟောတာ မဟုတ်ဘူး၊ ယင်းဘ၀တို့ရဲ့ အို၊ နာ၊ သေ၊ ကွဲ ဆင်းရဲဒုက္ခကို ပြချင်လို့ဟောတာ၊ အ၀ိဇ္ဇာ၊ တဏှာ ဦးစီးပြီးလုပ်တဲ့ ကုသိုလ်ကံကြောင့် ရလာတဲ့ဘ၀မှန် သမျှ မုချပျက်ရမည့် အနိစ္စလက္ခဏာနဲ့ ခိုင်မြဲအောင် စိုးပိုင်ချုပ်ထိန်းလို့မရတဲ့ အနတ္တလက္ခဏာကို ပြချင်လို့ ဟောကြားတော်မူတာသာ ဖြစ်တယ်။
ဘ၀ဆိုတဲ့ ဖြစ်သဘောဟာ ၀ယဆိုတဲ့ ပျက်သဘောကိုသာ ဒလဟောပို့ဆောင်နေတာမို့ ဘယ်သူဟာ ဘယ်ကုသိုလ်ကြောင့် ဘယ်ဘ၀၌ဘယ်လို ကြီးကျယ်မြင့်မားတဲ့ စည်းစိမ်ချမ်းသာကြီးတွေကို ခံစားစံစားနေရပေ မယ့် မခိုင်မမြဲ ပျက်စီးခြင်းထဲသို့သာ ရောက်ရကြောင်းကို အမှန်သိစေဖို့အတွက်သာ ဟောတော်မူတာ။
ဘ၀ဖြစ်ခန်းတွေဟူသမျှ ဒုက္ခချည်းသာဖြစ်လို့ မြတ်ဗုဒ္ဓ ရွံမုန်းစက်ဆုပ်တော်မူတယ်၊ ချီးမွမ်းအားပေးမှု ဘယ်သောအခါမျှ ပြုတော်မမူဘူး ဒကာကြီးတို့။
ဘ၀ကို အကောင်းထင် သာယာလိုချင်မှု အ၀ိဇ္ဖာ၊ တဏှာ မပါတဲ့ ဘ၀ပြတ်လုပ်ငန်းကိုသာ ဗုဒ္ဓလိုလား နှစ်သက်လက်ခံ အားပေးတော်မူတယ်လို့ မှတ်ပါ၊ ဒါပဲ။
ဒကာ။ ။ အားရကျေနပ်လှပါတယ် ဆရာတော်၊ ဘ၀ကိုလည်း မရယူမရှာမှီးချင်တော့ပါဘူး ဘုရား။
No comments:
Post a Comment