မြင် ကြား နံ သိ စိတ်တွေဟာ ဥပေက္ခာ သုခ ဒုက္ခ ဝေဒနာတို့လော
ဒကာ။ ။ မြင်သိ ကြားသိ နံသိ စတဲ့ ပဉ္စဝိညာဏ်စိတ်တွေဟာ ဥပေက္ခာစိတ်တွေလို့ သင်္ဂြိုဟ်ကျမ်းမှာ သင်ဖူးပါတယ်၊ ဒါကို ဆရာတချို့က မြင်သိ စက္ခုဝိညာဉ်စတဲ့ စိတ်တွေဟာ သုခရော ဒုက္ခပါ ဝေဒနာသုံးမျိုးလုံး ရှိတယ်၊ ဒါကိုသိအောင် ရှုမှတ်ရမည်လို့ ဟောကြားနေကြတယ်၊ ကျမ်းဂန်က ဘယ်လိုများ ညွှန်ကြားထားတယ်ဆိုတာ ရှင်းပြပေးပါဦး ဆရာတော်။
ဆရာ။ ။ ဟုတ်ပါတယ် အဘိဓမ္မာဟောစဉ်မှာတော့ မြင်ဆဲ ကြားဆဲ စတဲ့ခဏမှာ သုခလည်းမရှိဘူး၊ ဒုက္ခလည်း မရှိဘူး၊ ဥပေက္ခာဝေဒနာ တပါးသာ ရှိတယ်လို့ ဟောတော်မူပါတယ်။
ဒကာ။ ။ ဒီလိုဆိုရင် ဝေဒနာသုံးပါးရှိတယ်ဆိုတာ မှားတာပေါ့ ဆရာတော်၊ ဘာလို့ အမှားတွေ ဟောနေကြတာလဲ။
ဆရာ။ ။ သုတ္တန်ဒေသနာတော်များမှာတော့ ဒွါရခြောက်ပါးလုံးက ဝင်လာတဲ့ ကုသိုလ် အကုသိုလ် အကျိုးဖြစ်တဲ့ အာရုံတွေမှန်သမျှဟာ သုခရော ဒုက္ခရော ဥပေက္ခာရော သုံးပါးစလုံး ဖြစ်တယ်လို့ ဟောထားပါတယ်၊ ပုံစံပြရရင် သတိပဋ္ဌာန်သုတ္တန်မှာ-
သုခံ ဝါ ဝေဒနံ ဝေဒယမာနော သုခံ ဝေဒနံ ဝေဒယာမီတိ ပဇာနာတိ။
စသည်ဖြင့် ဟောကြားတော်မူတာတွေ များစွာပဲ ရှိပါတယ်၊ ဒါ့ကြောင့် မမှား ပါဘူး၊ သုံးပါးလည်း မှန်တယ်။
ဒကာ။ ။ အဘိဓမ္မာနည်းနဲ့ သုတ္တန်နည်း အမှန်ယူပုံများကို ရှင်းပြပါဦး ဆရာတော်။
ဆရာ။ ။ အာရုံငါးပါးဝီထိချတဲ့အခါ မြင်သိ(စိတ်ဝိညာဉ်) စိတ်ခဏမှာ ဥပေက္ခာဖြစ်ပေမဲ့ စိတ်တွေက မနားဘဲဆက်ပြီး ဇောထိအောင် ဖြစ်သွားတဲ့အတွက် ဇောခဏကျတော့ကာ ဝေဒနာသုံးမျိုးလုံးပင် အကြောင်းအားလျော်စွာ ဖြစ်နိုင်တာကြောင့် သုတ္တန်ဒေသနာတော်က အဘိဓမ္မာ ပဉ္စဒွါရဝီထိ ဇောစိတ်ကို မှီပြီးတော့ ဝေဒနာသုံးမျိုးလုံးပင် ဖြစ်နိုင်တယ်လို့ ဟောတော်မူတာဖြစ်တယ်၊ ကဲ….ရှင်းပြီးလား၊ စက္ခုဝိညာဉ် မြင်သိစိတ်တင် ရပ်နေတာ မဟုတ်ဘူး၊ မနောဝိညာဉ်ဇောစိတ်တွေက ဆက်ဖြစ်သွားတာ။
ဒကာ။ ။ ရှင်းပါပြီ ဆရာတော်၊ ဝီထိစိတ်ကျမှပဲ ရှင်းတော့တယ်၊ ကျမ်းဂန်မနှံ့တော့လည်း ခက်တာပဲကိုး၊ ဟိုစွပ်စွဲ ဒီစွပ်စွဲနဲ့။
No comments:
Post a Comment